【專欄作家：荔枝孖媽】一起分享 如何育成愛閱讀子女 陪養愛閱讀的好習慣
相信大家都認同現今嘅孩子物質、娛樂豐富，出生係電子產品同千變萬化嘅世界之中，其實無形中大大改變咗孩子嘅生活、學習模式，同樣亦為作為父母嘅我地帶嚟教養嘅新挑戰。
可以將孩子帶領導到創意無限天馬行空嘅世界當中
可以為孩子嘅世界增添無窮嘅樂趣同埋繽紛嘅色彩
更加可以打破人同人之間嘅隔膜，將人連結埋一齊
可以令孩子擴闊視野，認識世界同埋社會嘅真貌，去探索更多未知嘅角度
特別喺現今嘅社會的確比以前來得更加困難，孩子唔係睇電話、就係玩遊戲。因為對孩子來說比起睇書，從電子產品獲得嘅滿足、還有感官刺激來得大很多。
而更加無可否認嘅係，以家嘅小朋友的確比我哋以前忙咗好多好多倍。時間表本來就已經排得密密麻麻，做功課、補習班、興趣班，就連遊戲同休息嘅時間都未必夠，更加唔好話有時間可以靜靜地細心閱讀啦。
我地做父母為孩子籌謀當然係正常啦，但大家有冇諗過如果多啲時間喺閱讀上面，可以令到孩子從小培育出良好嘅閱讀習慣，佢哋嘅世界將會變得無限大。
如果你都係認同閱讀對孩子重要性嘅父母，又想一齊探討下點樣可以培育新一代嘅孩子養成閱讀嘅好習慣，我哋不妨一齊傾下呀。
我絕對認同閱讀係學習嘅基石，更加係伴隨孩子一輩子成長嘅重要一環，閱讀除咗培養孩子嘅專注力、語文能力外；更可透過閱讀引導孩子嘅繪畫細節能力、仲有故事都可以為孩子提升觀察力、仲有推理能力。
閱讀能夠豐富小朋友的想像力，佢哋可以透過討論，自發性地創造出更多其他故事、及情節、甚或係故事結局都可以係小朋友無限的想像力出創造出來。
平日上課，都會有好多家長問家中嘅幼童好唔專心呀，可以點做?
到底點樣先可以幫孩子建立良好嘅品格等? 我往往都會回答: 閱讀係其中一個不二法門。
故事繪本往往會以唔說教的形式，輕鬆嘅方式帶出正確嘅價值觀畀小朋友。幫助小朋友喺閱讀之中領悟到箇中嘅教育、吸取前人嘅智慧、建立良好嘅品格、陪養出良好嘅行為規範、幫助情緒疏導等、而親子之間更可以喺共讀之中得到樂趣。
新世代嘅父母都會擔心小朋友嘅心靈、情緒等問題，亦有可能擔心小朋友將來面對挫折、逆境，唔識得點樣去疏導情緒。其實簡單共讀一本同情緒有關的繪本，係閱讀同討論嘅過程之中，唔單止能夠培養孩子嘅情緒智能，父母亦都可以係當中得到教養嘅提醒。
明白以後，大家都會問底點樣先係比較行之有效嘅方法，可以引導小朋友培養出閱讀嘅習慣呢?
1. 當然係父母嘅身教呀。正所謂身教更勝言教。
培養小朋友閱讀習慣，父母係當中擔任正非常重要嘅角色，試問一下自己，我哋父母係咪都喜歡閱讀!? 屋企有冇營造出閱讀嘅家庭氣氛!?
其實好多時孩子嘅行為都係由父母潛移默化而產生，試想下如果父母只係沉迷手機同埋終日睇電視，同樣地小朋友嘅習慣亦都只會同樣地建立下去。
相反；如果父母好多時候都係專注閱讀，自然小朋友亦會在潛移默化之下受這正面的影響，所以父母愛閱讀，而且係適當時候用書本中有趣話題去吸引小朋友，絕對係係引發小朋友喜愛閱讀嘅其中一種有效動機。
2. 同樣重要嘅係父母陪同、引導之下，對培養小朋友愛閱讀亦係不可或缺嘅一環。
因為親子共讀嘅陪伴方式，可以有效促進小朋友認知發展、提升閱讀嘅樂趣。另外父母可以同小朋友定下閱讀嘅特定時間；養成親子共讀嘅習慣，將來慢慢為孩子自行閱讀殿下重要嘅基石。
3. 由孖寶自少開始我，哋已經有一個細細嘅書櫃係放在佢地可以看到，隨手拿到的地方。由細個開始慢慢培養一個閱讀嘅環境，慢慢變成而家開始有一個比較大嘅書櫃，比小朋友隨手可以自己拎到佢想睇嘅書，亦最好能夠清晰展示部分書本，咁樣絕對可以刺激孩子閱讀嘅意欲，有助佢哋提升讀嘅習慣呀。
4. 值得一提嘅就係如果小朋友唔想睇嘅時候，父母千祈唔好勉強小朋友要繼續閱讀，我哋可以多作正面嘅鼓勵，保持愉快同輕鬆嘅閱讀時光。仲有就係共讀嘅過程之中盡量唔好去迫小朋友去認字，比機會小朋友真真正正咁體會到閱讀嘅樂趣。
5. 另外一個關鍵就係多啲帶小朋友去圖書館，或者書店。
父母可以放輕鬆畀小朋友安靜咁去睇書，等小朋友自己探索佢有興趣嘅議題同埋內容。我地父母可以從旁觀察小朋友興趣喺邊度，將來可以更容易感培養小朋友愛上閱讀，令佢哋慢慢一步一步接觸更多唔同類型嘅書籍。
你會發現當小朋友自由自在咁喺閱讀嘅天空之中翱翔，其實閱讀比電子世界，更寬、更廣、更有趣，好希望每一位父母都可以透過親子共讀，慢慢發現其實自己同樣都係可以好享受一齊共讀嗰份親密嘅感覺，親子共讀確實唔單止係令小朋友得益，同時亦係建立同子女之間親密時光嘅好方法。
－－－－－－－－－－－－－－－－－－－－－－－－－－－
荔枝孖媽是＊美國NAHA國際芳香治療師 ＊ 嬰兒按摩指導師 ＊ 國家兒童遊戲治療師 ＊ 兒童體適能教練 ＊ 嬰兒瑜伽指導師 ＊兒童早期教育導師＊
一日之間，成為兩子之母！充滿愛與驚喜。曾經致力遊歷世界唔同的地方，到而家變成致力育兒的雙職媽媽。
希望把生活中每一個美好時光都記錄下來。親子育兒，美容扮靚，飲飲食食，購物，好物都想同大家分享! 更希望與大家一起見證孖寶的成長，分享他們生活的大小趣事。
